अनन्तश्री विभूषित जगदगुरु महायोगी सिद्धबाबाको पावन आविर्भाव महोत्सवका अवसरमा रामानन्दाचार्य सेवा पीठले विद्यार्थीलाई छात्रवृत्ति प्रदान गरेको छ ।
जगदगुरु जन्मोत्सवका अवसर पारेर बुधबार आयोजित छात्रवृत्ति हस्तान्तरण कार्यक्रममा जगदगुरु महायोगी सिद्धबाबाले मधुवनकी मनिषाकुमारी मेहता र चतराकी मनिषा थापालाई जनही १३ हजार रुपैयाँ हस्तान्तरण गर्नुभयो ।
यस्तै भोजपुरकी कन्चन खत्री, चक्रघट्टीकी एलिना श्रेष्ठ, इक्राहीकी सुरक्षा कार्कीलाई जनही १६ हजार रुपैयाँ प्रदान गरिएको छ ।
भरौलकी दीपा विष्ट र चक्रघट्टीकी दीक्षा न्यौपानेले क्रमशः १० हजार २ सय र १५ हजार ८ सय छात्रवृत्ति स्वरुप प्राप्त गरेका छन् ।
छात्रवृत्ति प्राप्त गर्ने विद्यार्थीहरुमा विद्यालय र क्याम्पस अध्ययन गर्ने विद्यार्थी रहेका छन् । उनीहरुलाई पीठले अध्ययन गर्न लाग्ने वार्षिक रकम प्रदान गरेको पीठका सेवक आकाश शर्माले जानकारी दिनु भयो ।
पीठको सामाजिक उत्तरदायित्वसँगै छात्राहरुको अध्ययनलाई हौसला प्रदान गर्न छात्रवृत्ति प्रदान गरिएको पीठले जनाएको छ ।
