मोरङको कानेपोखरी गाउँपालिका-७ मा यात्रुवाहक बसले मोटरसाइकललाई ठक्कर दिँदा एक जनाको मृत्यु र एक जना गम्भीर घाइते भएका छन्।
गोर्खा यातायातको बस झापाबाट धरानतर्फ जाँदै गर्दा विपरीत दिशाबाट आइरहेको मोटरसाइकललाई ठक्कर दिएको इलाका प्रहरी कार्यालय पथरीका डीएसपी मोहनविक्रम दाहालले जानकारी दिएका छन्।
मोटरसाइकलको पछाडि सवार उदयपुर बेलका नगरपालिका-४ की ५५ वर्षीया कुमारी आचार्यको घटनास्थलमै मृत्यु भएको छ। मोटरसाइकल चालक इटहरी उपमहानगरपालिका-४ का ३५ वर्षीय हरि शर्माको अवस्था गम्भीर छ र उनलाई उपचारका लागि विराटनगर पठाइएको छ।
प्रहरीका अनुसार मृतक र घाइते दिदी-भाइ हुन्। प्रहरीले दुर्घटनापछि बस र चालकलाई नियन्त्रणमा लिएको छ र घटनाबारे थप अनुसन्धान भइरहेको छ।
