रुकुम,– रुकुम जिल्लाको बाँफीकोट गाउँपालिका–२ की ४० वर्षीया नन्दकला खड्का खत्रीलाई गर्भावस्थाको जटिलताका कारण हेलिकप्टरबाट उद्धार गरी प्रदेश अस्पताल, सुर्खेत पठाइएको छ।
उनको गर्भ पाठेघरको नलीमा बसेको र बच्चा हुर्किएर नली फुटेपछि आन्तरिक रक्तश्राव भएको अवस्थामा उनलाई जिल्ला अस्पताल लगिएको थियो। अस्पतालमा सफल शल्यक्रिया भएपनि सघन उपचारको आवश्यकता देखिएपछि राष्ट्रपति महिला उत्थान कार्यक्रमअन्तर्गत नेपाली सेनाको हेलिकप्टरबाट उनलाई सुर्खेत पठाइएको हो।
जिल्ला प्रहरी कार्यालयका सूचना अधिकारी ऋषि पाठकले यसको जानकारी दिए। उनको स्वास्थ्य अवस्था स्थिर रहेको अस्पताल प्रशासनले बताएको छ।
