विराटनगर, मोरङ – स्वास्थ्य तथा जनसङ्ख्या मन्त्री प्रदीप पौडेलले आम नागरिकले लोकतन्त्रको अनुभूति गर्न सकुन् भनेर स्वास्थ्य क्षेत्रलाई व्यवस्थित बनाउन आफू सक्रिय रहेको बताएका छन्।
गणतन्त्र दिवसको अवसरमा गणेशमानसिंह फाउण्डेशन, नेपाल रेडक्रस सोसाइटी र लायन्स क्लब अफ विराटनगरले धनपालथान गाउँपालिका–३, सोराभागमा आयोजना गरेको बृहत् स्वास्थ्य शिविरको उद्घाटन गर्दै मन्त्री पौडेलले स्वास्थ्य सेवालाई सहज र सर्वसुलभ बनाउन राज्यले लगानी बढाउनुपर्ने बताए।
मन्त्री पौडेलले “अन्तर्राष्ट्रिय अभ्यासअनुसार नागरिकको लगानीमा बिमा प्रणाली लागू गरी निःशुल्क स्वास्थ्य सेवा दिनुपर्छ” भन्ने जोड दिए। उनले स्वास्थ्य मन्त्रालयले आगामी बजेटमा सम्पूर्ण सङ्गठित क्षेत्रलाई स्वास्थ्य बिमासँग जोड्ने प्रस्ताव राखेको बताए। साथै, वैदेशिक रोजगारीमा गएका नेपाली कामदारले गन्तव्य देशबाटै पूर्ण स्वास्थ्य सुविधा पाउनुपर्ने माग गरे।
प्रदेशसभा सदस्य अमृत अर्याल, डोल्मा तामाङ र गयानन्द मण्डलले धनपालथानमा निर्माणाधीन १५ शय्याको अस्पतालको लागि सहयोग गर्न आग्रह गरे। यसैगरी, फाउण्डेशनका अध्यक्ष फलकुमार लालवानी र गाउँपालिका अध्यक्ष जीवछ गच्छदारले दुर्गम क्षेत्रका बासिन्दाको लागि भविष्यमा पनि यस्ता स्वास्थ्य शिविर सञ्चालन गर्ने प्रतिबद्धता जनाए।
यस एकदिने शिविरमा न्यूरो कार्डियो मल्टिस्पेशियलिटी अस्पतालका चिकित्सकसहित ५० जना स्वास्थ्यकर्मीले सेवा प्रदान गरेका छन्। शिविरमा क्षयरोग, न्यूरो, हाडजोर्नी, ग्यास्ट्रोलोजी, स्त्रीरोग, आँखा, चर्म, श्वासप्रश्वास, रगत परीक्षण लगायतका सेवा उपलब्ध गराइएको छ।
यसरी, सरकारी र निजी संस्थाहरूको सहकार्यमा दुर्गम क्षेत्रका नागरिकलाई गुणस्तरीय स्वास्थ्य सेवा पुग्ने विश्वास व्यक्त गरिएको छ।
