अमेरिकी राष्ट्रपति डोनाल्ड ट्रम्पले ग्रिनल्यान्डमाथि कब्जा जमाउन चाहेको बताउँदै आएको प्रसङ्गलाई लिएर ग्रिनल्यान्डका प्रधानमन्त्रीले सोमबार यो भनाइलाई ‘तरङ्गी’ बताएका छन्।
सोमबार डेनिस प्रान्तको विधायिकी निर्वाचनको पूर्वसन्ध्यामा प्रधानमन्त्री म्यूट बी. एगेडेले डेनिस सार्वजनिक रेडियोसँगको कुराकानीमा भने, ‘अहिले विश्व व्यवस्था धेरै मोर्चाहरूमा विभाजित भएको र डगमगाइरहेको छ। संयुक्त राज्य अमेरिकाका राष्ट्रपति ट्रम्पले धेरै अप्रत्याशित धारणा सार्वजनिक गर्दै विश्व समुदायलाई तरङ्गीत र असुरक्षित महसुस गराउनुहुन्छ।’
गत हप्ता अमेरिकी कंग्रेसलाई सम्बोधन गर्दै ट्रम्पले राष्ट्रिय र अन्तर्राष्ट्रिय सुरक्षाका कारण अमेरिकालाई विशाल आर्कटिक टापुको आवश्यकता रहेको तर्क गर्दै ग्रिनल्यान्ड कब्जा गर्ने आफ्नो योजना दोहोर्याएका थिए।
डेनमार्कबाट ग्रिनल्यान्डको स्वतन्त्रताको समयसीमा निर्धारण गर्दा यस क्षेत्रको चुनावी अभियान हावी भएको छ।
ट्रम्पले भनेका थिए, ‘हामी आफ्नो भविष्य आफै निर्धारण गर्ने तपाईंको अधिकारको दृढतापूर्वक समर्थन गर्दछौँ र यदि तपाईंले रोज्नुभयो भने हामी तपाईंलाई संयुक्त राज्य अमेरिकामा स्वागत गर्दछौँ।’
अमेरिकाले कुनै न कुनै रुपमा ग्रिनल्यान्ड पाउनेमा आफू विश्वस्त रहेको ट्रम्पको विश्वास छ। अमेरिकी कङ्ग्रेसमा कतिपय रिपब्लिकनसमेतलाई हाँसाको विषय बनेका यी योजनालाई धेरै ग्रिनल्यान्डवासीहरूले उपहासको रूपमा लिएका थिए।
‘हामी सम्मानका साथ व्यवहार गर्न योग्य छौँ। तर अमेरिकी राष्ट्रपतिले पदभार ग्रहण गरेदेखि पछिल्लो समय यस्तो गरिरहेको जस्तो मलाई लाग्दैन,’ एगेडेले भने।
उनले थपे, ‘अमेरिकी राष्ट्रपतिले हालै दिएका अभिव्यक्तिको अर्थ यो हो कि हामी अमेरिकासँग विगतमा जति नजिक थियौँ त्यति नजिक हुनु चाहदैनौँ।’
ट्रम्पले कङ्ग्रेसलाई सम्बोधन गरेको भोलिपल्ट नै इजेडले फेसबुकमा लेखेका थिए, ‘ग्रिनल्यान्डका बासिन्दाहरू अमेरिकी वा डेनिस केही पनि बन्न चाहँदैनन्। हामी ग्रिनल्यान्डवासी हौँ। अमेरिकी र उनीहरूका नेताले यो कुरा बुझ्नुपर्छ।’ एएफपी
प्रकाशित: २६ फाल्गुन २०८१ १९:४५ सोमबार
